西班牙 Rioja 產區陳年葡萄酒 - 分級制度
如果你有飲過西班牙酒、特別係紅酒嘅話，相信你或多或少都會聽過以下呢個西班牙頂級 DOCa (法定優質產區) 嘅名，Rioja。
Rioja，喺西班牙葡萄酒嘅地位，可以話相當於 Bordeaux 係法國嘅地位。Rioja 位於西班牙中北部，喺佢北面嘅 Cantabria 山脈成爲佢嘅天然屏障，阻擋嚟自大西洋嘅海風，為佢帶嚟大陸型氣候，特別適合大規模種植西班牙嘅國寶級紅葡萄品種，Tempranillo。
西班牙文入面，「Temprano」指「早熟」，而「illo」指「細小」，加埋做 Tempranillo，意思即係早熟嘅小葡萄。
Tempranillo 葡萄果皮比較厚，所以釀製出來嘅紅酒色澤偏深，呈紅寶石顔色，單寧高得來柔順，酒體輕至中等，酸度適中，酒精度略為高。佢嘅複雜性為佢帶嚟良好嘅架構，釀造出來嘅紅酒都具有陳年潛力。
Tempranillo 嘅典型香氣，除左有新鮮嘅紅黑漿果味之外，喺佢經過橡木桶蘊藏之後，更加可以帶有雲呢嗱、甘草、朱古力等等嘅香味，富有層次感。而喺陳年過後，亦都會有少許皮革嘅味道。
Rioja 葡萄酒產區，有特定嘅一套陳年葡萄酒分級制度，強制要求產區内嘅酒莊所生產嘅葡萄酒，都需要最少符合法定嘅陳年時間，並且要貼上帶有 Rioja 產區標誌的唔同顏色標籤。（就好似買電器嗰陣，一定見到嘅能源標籤咁）
陳年等級由低至高可以分為：Generic、Crianza、 Reserva、Gran Reserva。
Generic：泛指任何未達到陳年基本要求嘅酒，可以簡單理解為陳年兩年以下嘅酒。上集提到嘅葡萄牙綠酒，特點 係年輕。如果夾硬要套用Rioja嘅分級制度，佢就會係屬於呢個級別。
Crianza：陳年葡萄酒嘅入門級別，紅酒 同白酒嘅要求唔同，喺每個級別對陳釀時間嘅要求，白酒都係相對短啲。為免混亂，我地專注睇對紅酒嘅要求就可以：
Crianza 紅酒必須經過最少 2 年嘅陳釀，其中最少有 1 年要係橡木桶入面陳釀。如果你只係想感受豐富嘅果香，或者冇時間去慢慢醒酒，Crianza 嘅紅酒係一個好好嘅選擇。
Reserva：要求嘅陳釀時間多少少，紅酒必須經過最少 3 年嘅陳釀，其中最少有 1 年係橡木桶入面陳釀。如果你想多啲感受佢單寧嘅厚實同複雜性，你一定可以喺 Reserva 嘅紅酒搵得到。
Gran Reserva：要求嘅陳釀時間最長，紅酒必須經過至少 5 年嘅陳釀，其中至少有 2 年喺橡木桶入面陳釀。Gran Reserva 葡萄酒會係以桶味主導、單寧完整，具有極高嘅陳年潛力。
不過，陳年酒並唔係一定要越高級，先至越好飲。飲酒嘅口味因人而異，但凡係 Rioja 出產嘅酒，都有品質保證。
喺陳年等級表以外，Rioja 嘅酒仲有一啲特別版，譬如係：
Club Reserva，通常係嚟自著名酒莊釀造的優質葡萄酒。
Reserva Especial，由精選特定年份採收嘅葡萄去釀造嘅酒。
Único，字面意思係唯一、獨特，通常係酒莊自己嘅旗艦葡萄酒，會用上獨特嘅釀製技術，具有酒莊風土特色。
如果有興趣品嚐西班牙 Rioja 嘅各款 Tempranillo 陳年紅酒，歡迎嚟到 Fino Vino 購買來自西班牙酒莊 Bodegas Altanza 嘅陳年紅酒！
