「綠酒」，你試過未？
葡萄牙嘅綠酒，喺市面比較少見，甚至各大零售點嘅貨架上都從來冇見過「綠酒」嘅存在。「綠酒」係專門指由葡萄牙綠酒產區 Vinho Verde 出產嘅酒，係非常清新、非常年輕嘅酒，而當地出產嘅通常會係以白酒居多。
葡萄牙文嘅 Vinho Verde，係綠酒產區嘅名稱。Vinho，係酒嘅意思，而 Verde，除咗指綠色（覆蓋成個產區嘅綠色葡葡園）之外，更加係講緊綠酒比其他酒較為年輕嘅特點。綠酒通常都會喺葡萄採收3-6個月之後，就已經開始推出市場。正因為綠酒嘅年輕，佢帶有大自然的清新感，酒精含量通常比較低，約為8.5-11%，令佢成為一款輕盈同埋易飲嘅酒。
Vinho Verde綠酒產區位於葡萄牙西北面，鄰近大西洋嘅 Minho 地區，喺 1908 年正式被劃定為 DOC 產區。綠酒產區係葡萄牙最古老嘅產區之一，喺 2,000 幾年之前古羅馬時代已經有歷史記載。
綠酒通常由多款當地葡萄品種混合而成， 包括 Alvarinho、Loureiro、Trajadura 同 Arinto 等等，多元嘅品種賦予咗 Vinho Verde 多樣嘅風味
綠酒嘅其中一個特點就係佢嘅高酸度，令佢有一種清新同埋爽口嘅特性。呢種酸度令佢成為炎炎夏日嘅完美選擇，適合雪凍之後飲用。綠酒嘅天然酸度可以增強食物嘅風味，同海鮮、沙律或者東南亞菜式配搭起上嚟都好夾。對於鍾意海鮮嘅人嚟講，綠酒係絕佳嘅 Wine Pairing 選擇！當然綠酒亦都好適合齋飲，酸MayMay嘅味道加上微氣泡，綠酒可以講話係成年人都會啱飲嘅汽水。
相比起其他葡萄酒，綠酒以年輕同埋易飲嘅特點而聞名，好適合休閒飲用同戶外聚會。無論您係咩年紀，都一定可以喺綠酒當中品嚐到青春嘅氣色，充分感受到佢充滿活力同清新嘅特性。如果有興趣品嚐下綠酒嘅清新，歡迎嚟到 Fino Vino 購買來自葡萄牙酒莊 Quinta de Raza 嘅綠酒！