適逢大年初一，今日同大家分享下各款賀年美食嘅 Wine Pairing 組合。
首先係賀年糕點同葡萄酒嘅配搭。由於各款糕點有唔同嘅口感，所以建議每款用唔同嘅酒嚟配搭。
- 芋頭糕綿密嘅口感最啱配搭結構完整嘅紅酒，例如西班牙嘅Tempranillo或者意大利嘅Montepulciano，煎香嘅芋頭同臘味嘅油份可以令紅酒單寧變得圓潤，同時突顯果香。
- 蘿蔔糕就比較適合配高酸度嘅白葡萄酒，例如年輕、清新嘅葡萄牙綠酒。微鹹嘅蘿蔔糕可以帶起綠酒嘅果香同甜美感。
- 年糕作為甜膩嘅糕點，最啱配搭微甜嘅Riesling Kabinett，高酸度可以中和返回年糕嘅油份。
- 馬蹄糕清甜爽口，建議配Muscat甜氣酒，佢清爽嘅花香同微氣泡可以互相襯托出清新嘅甜味。
至於油膩嘅賀年小食，例如煎堆、油角、瓜子、開心果等等，最適合配上帶有濃郁核果同柑橘味嘅白葡萄酒，典型例子有西班牙嘅Albariño或者葡萄牙同款的嘅Alvarinho白酒。
正餐菜式方面，如果係油膩、濃味、醬料多嘅肉類菜式，例如係扣肉、燒鵝、燒鴨，最直接嘅方法就係配高酸高丹寧嘅Cabernet Sauvignon，可去除食物嘅油膩感，同時肉裏面嘅蛋白質和鹹味都令會到紅酒單寧變得柔順。
至於龍蝦或者其他海鮮，可以考慮配搭西班牙嘅Cava氣酒，佢嘅高酸度、氣泡同礦物感都可以突顯海鮮嘅鮮味。
上述提到嘅各種酒菜配搭都只係一啲參考，食物嘅製作方式、烹調方法同醬料都會影響Wine Pairing效果，所以每個人都可以根據自己嘅口味揀出最適合自己嘅配搭。Fino Vino祝大家龍年食得開心，搵到更多屬於自己嘅餐酒配搭。Cheers！